Германците затекнати, рекордно намалена продажбата на домашно пиво!
Објавено во: Свет 30 Јануари, 2013
Минатата година продажбата на пиво произведено во Германија се намалила на рекордно ниско ниво. Продадени се 96,5 милиони хектолитри, односно 1,8 отсто помалку отколку во 2011 година, објави германската Државна агенција за статистика - Дестатис.
Според Деситас, на германскиот пазар лани се продадени 83,9 отсто или 81 милион хектолитри од произведеното пиво, што во однос на 2011 година е помалку за 2,1 отсто. Обемот на извоз на германското пиво во земјите од ЕУ е намален за два отсто, на 11 милиони хектолитри, но извозот во земјите надвор од Унијата е зголемен за 4,6 проценти и достигнал 4,3 милиони хектолитри.
Лидери во производство на пиво, како и претходните години, се сојузните држави Северна Рајна-Вестфалија и Баварија. Лани тие произвеле 24,7, односно 22,9 отсто од вкупното количество на пиво произведено во земјата.