Главниот преговарач на ЕУ лета за Вашингтон: „Царините на Трамп би нè чинеле 4,4 милијарди долари - дневно“

Добивај вести на Viber

Европската комисија потврди дека комесарот на ЕУ за трговија, Марош Шефчовиќ, денес патува во Вашингтон за да се сретне со американскиот секретар за трговија, Хауард Лутник, и трговскиот претставник Џејмисон Грир.

Целта на патувањето на Шефчовиќ во Вашингтон и на средбите е да се постигне договор со САД за царините пред 1 август, кога администрацијата на Трамп би можела да воведе нови, високи царински стапки за европските стоки.

Заканите на Трамп за воведување царини од 30 отсто за европските стоки сериозно би ги загрозиле трговските односи меѓу САД и ЕУ, предупреди претходно Марош Шефчовиќ, европски комесар за трговија.

Тој рече дека ваквите тарифи би ја направиле трговијата вредна дури 4,4 милијарди евра дневно речиси невозможна, пишува „Гардијан“.

И покрај заострувањето на реториката, Шефчовиќ рече дека постои желба за договор до 1 август, нагласувајќи дека царинските давачки од 30 проценти би биле „апсолутно неприфатливи“.

Пред објавата на Трамп на социјалните мрежи, ЕУ и САД беа блиску до договор за царини од 10 отсто - иако европската страна исто така го смета ова за „болно“.

ЕУ ги одложи планираните контрамерки за американски производи во вредност од 21 милијарда евра, но разгледува дополнителни мерки што би можеле да вклучуваат 72 милијарди евра.

Деталите сè уште не се објавени, но постои подготвеност за одговор. Францускиот претседател Макрон повика на забрзување на подготовките за контрамерки, додека германскиот канцелар Мерц предупреди дека царините особено ќе го погодат германскиот извоз.

Германската стопанска комора проценува дека неизвесноста околу политиката на Трамп би можела да го намали извозот за речиси милијарда евра месечно.

Некои источноевропски лидери стравуваат дека контрамерките би можеле да доведат до повлекување на американската воена поддршка од Европа.

Иако Велика Британија постигна трговски договор со САД, таа нема да биде поштедена бидејќи сè уште е силно поврзана со европските синџири на снабдување.