Глигор Бишев на чело на Шпаркасе?

Добивај вести на Viber

Глигор Бишев, првиот човек на Стопанска банка од Скопје, заминува од банката и во иднина ќе раководи со Шпаркасе банка, велат извори од банкарскиот сектор, пишува Дневник. Преговорите биле интензивни и всушност станува збор за обновени разговори што се водат во централата на Шпаркасе во Грац. Претходно преговори за преземање на челната позиција во банката биле водени и кон крајот на 2011, односно почетокот на 2012 година. Од Народната банка на Македонија која треба да даде одобрение за застанување на Бишев на чело на друга банка одговорија дека немаат такво барање. Бишев сеуште не одговорил дали е точно дека ја напушта Стопанска банка и заминува во друга банка, додека од Шпаркасе официјален одговор се очекува за два дена. Иако информацијата е „за неверување“ со оглед дека Стопанска банка е втора по големина банка во државата, а Шпаркасе е петта, со „желба“ да стане трета, сепак, извори за Дневник велат дека Австријците имале сериозни намери да ја зајакнат банката. Во еден период дури постоела намера за купување на една од двете најголеми банки во државата и тоа преку Ерсте банката која е 25 отсто сопственик на „Штаермаркише шпаркасе“ од Грац. Преговори наводно биле водени за купување на Kомерцијална банка, но понудената „продажна цена“ била превисока. Истите извори додаваат дека Стопанска веројатно тешко би можела да биде продадена бидејќи е „златна кокошка“ на Националната банка на Грција во чија сопственост е. Зајакнувањето на банката, централата сака да го обезбеди со поставување на искусен банкар на нејзино чело, со големо искуство, каков што во секој случај е Глигор Бишев. Причината, пак, за заминување на Бишев од Стопанска, исто така е во сферата на шпекулациите. Едната е „непристојниот предлог“ од Шпаркасе, а втората е несогласувањето со челните луѓе на НБГ врзани за одливот на средства кон Грција, пишува весникот.