Големи очекувања на владиниот врв од Казахстан, потенцијали на сите страни

Добивај вести на Viber

Економскиот форум „Астана“ беше одлична можност да ги претставиме нашите поволности за инвестирање но и место за размена на мислења за кризата и како другите држави се справуваат со неа, истакна   премиерот Никола Груевски кој вчера ги презентираше можностите за инвестирање во Македонија за време на обраќањето пред околу 3.000 луѓе во Казахстан.

За време на Форумот посветен на предизвиците со кои се соочуваат државите во период на криза, Премиерот потсети дека единствено со постојана инвестициска активност, реформи и мерки може да се пребродат кризите.

Павлески и Мизо во лов на инвеститори

Директорот на Дирекцијата за технолошко-индустриски развојни зони Виктор Мизо кој со владината делегација отпатува во Астана,  истакна дека Казахстан е една од најбрзо растечките земји во развој  и земја која без разлика на економската криза  немаше намалување на економски раст.

„Она што казахстанската економија може потенцијално да го нуди за Македонија се две различни компоненти. Прво, потенцијалот на македонски компании да настапат на нивниот локален пазар. Пред се, тука би биле градежните компании, но и фармацевтските компании. Од друга страна, тука се потенцијалите на нивниот државен фонд, кој разгледува кои се потенцијалните места за инвестирање“, истакна Мизо.

Министерот за странски инвестиции Бил Павлески пак оцени дека Форумот има  големо значење бидејќи ги поврзува Европската унија и азиските земји. Тој посочи дека сите компаниите учеснички од Европа и Азија, се запознале можностите за водење бизнис во Македонија но и освојување нови пазари.