ГПРС систем во касите, сонце на сметките: трговците задоволни од новините во готовинскиот промет

Добивај вести на Viber

Новите измени кои од 1 јануари стапуваат во сила и со кои задолжително станува користењето фискален систем за регистрирање на готовински плаќања, значат и спас од  нелојалната конкуренција. Ваков е ставот на големите трговци кои истакнаа дека целосно го поддржуваат новото решение. Тие денеска побараа Министерството за финансии са се изјасни дали ќе може и понатаму да се употребуваат веќе вградените софтверски решенија со кои сега се следи прометот, или ќе им треба нов софтвер што пак значително ќе ги зголеми нивните трошоци.

Како што истакна Никола Начовски, генерален менаџер на „Тедико Супер“ Скопје, потребните софтвери трговците ги вградија уште пред 7 години кога се носеше законот за купување македонски производи.Тој побара да се дозволи нивно понатамошно користење бидејќи еднаш веќе се платени од компаниите.

„ Втората наша иницијатива е, наместо на секоја каса, GPRS уред да се вгради на локалните сервери кои ги поврзуваат сите каси. Така, од едно место би се контролирало целото готовинско плаќање“, побара Начовски.

Со новините во Законот за регистрирање готовински плаќања,  даночните обврзници со промет над 10 милиони денари годишно, ќе треба да воведат фискален систем до 31 март 2014, а останатите до 30 јуни 2014. Исто така се предвидуваат враќање на т.н. патриотски фискални сметки со македонско сонце, мерка која не даде некои позначителни резултати кога беше воведена во 2008-та.

За Митко Митевски од Здружението на трговија при Стопанската комора, генерално, задолжителниот фискален систем за регистрирање на готовински плаќања ќе создаде услови за фискална дисциплина во услови кога во структурата на вкупниот промет во трговијата на мало, готовинското плаќање учествува со околу 90 отсто.