Градот Скопје и Општина Центар во кавга кој треба да ги обесштети граѓаните за поплавите

Добивај вести на Viber

Околу два милиони денари се потребни за обесштетување на граѓаните во Општина Центар за штетите настанати во поплавите и обилните врнежи кои ја зафатија оваа општина на 25 мај, пресмета општината. Се работи за 37 објекти каде што комисијата за проценка на штети формирана од општина Центар ја утврди фактичката состојба ја констатираше штетата настаната од поплавите. Од оваа општина велат дека најпрвин за надомест на штетата се обратиле во Град Скопје, но од таму одбиле финансиски да помогнат и ги препратиле на адреса на Владата на Република Македонија. „Општина Центар го достави извештајот на комисијата и до министерството за финансии и до Владата на РМ и известува дека е направена штета од невремето и бара уплата на 1.970.000 денари на сметката на општина Центар за да може на граѓаните да им се надомести штетата. Доколку и Владата не покаже слух за ургентните потреби на граѓаните, тогаш општина Центар ќе им излезе во пресрет на жителите погодени од поплавите на Центар со средства од сопствениот буџет“, стои во соопштението на Центар. Веднаш реагираа од Градот Скопје, од каде велат дека, за нив ваквата реакција на општинската администрација во Центар е несфатлива. „Градот Скопје информира дека во рамките на своите законски надлежности нема можност да обештетува при настанати вакви состојби. Нас не ни е јасно од кои причини Општина Центар, во ова нејасно и конфузно соопштение, се повикуваат на Град Скопје како институција. Градот Скопје не се оградува од никаква одговорност и апелира Општина Центар да се однесува согласно законските прописи, како и дадените насоки од Владата на Република Македонија“, стои во соопштението од градските власти. Во него се потенцира дека Градот Скопје, веднаш по настанувањето на поплавите, ги презел сите мерки во сопствена надлежност - ги мобилизираше екипите на сите јавни претпријатија и Противпожарната бригада на Град Скопје и тие веднаш интервенираа на сите кризни точки.