Граѓаните се жалат на бавноста на Македонски пошти, почнал процесот на нејзина приватизација

Добивај вести на Viber

Граѓаните незадоволни од брзината на пратките кои се пренесуваат преку Македонски пошти, се почесто бираа услуги од поштенските оператори што ги остваруваат своите активности на слободниот пазар. Последниот извештај на Агенцијата за пошти, во кој се истражува задоволството на корисниците на услугите на поштенските оператори за 2012 година, покажал дека расте бројот на корисници на услугите на брзата пошта и на операторите што нудат експресна достава. Извештајот покажал и дека поштенски услуги најчесто се користат за лични потреби и пренос на писма, подароци и честитки во земјава, за кои корисниците очекуваат дека ќе бидат доставени за еден до три дена максимум. Од вкупно 800 испитаници, 28 проценти рекле дека не се задоволни од брзината на доставата, а 37 проценти дале неутрален одговор. Македонскиот поштенски пазар веќе четврта година по ред бележи пораст во однос на вкупниот број доставени поштенски пратки. Лани е евидентиран обем од 75 милиони пратки, што претставува пораст од околу 17 проценти во однос на претходната година. Моментно просечниот број на поштенски пратки е 36 по глава на жител, посочи Влатко Атанасовски, директор на Агенцијата за пошти. Тој посочи и дека процесот на приватизација на MП е веќе почнат, а до крајот на 2014 година МП има ексклузивно право да доставува поштенски пратки со тежина до 50 грама, по што и останатите оператори добиваат право да ги доставуваат тие пратки по пазарни услови. „Тоа ќе биде година во која националниот оператор ќе успее или не доволно да се прилагоди на конкурентските услуги и во која останатите оператори ќе треба да се етаблираат на пазарот и да го заземат својот пазарен удел. Се надевам дека континуираниот тренд на пораст на пазарот ќе продолжи и следната година, а Агенцијата за пошти како регулатор се разбира треба да овозможи соодветна правна рамка за успешна реализација“, изјави Атанасовски.