Граѓаните го гушнаа ГТЦ и му кажаа НЕ на барокот

Добивај вести на Viber

Со заедничко гушкање на ГТЦ, голем број граѓани денеска го искажаа својот револт поради најавите за промена на фасадата на објект кој треба да се вклопи во барокот на околината. Тие пратија порака дека ГТЦ го сакаат таков каков што е, а ако се реставрира тогаш треба да се зачува неговата автентичност. Од рано утрово, па се до вечерта на влезот на ГТЦ се собираа потписи за петицијата за спас на ГТЦ од барокот. „Имаме заедничка одговорност за она што го оставаме на идните генерации. ГТЦ мора да остане отворен, проточен за пешачко движење, функционален, автентичен, градски,“побараа од Асоцијацијата на архитекти на Македонија кои беа организатори на настанот. За архитектот Сања Раѓеновиќ Јовановиќ, значењето на ГТЦ е огромно, за скопјани не само затоа што е дел од нивниот живот и секојдневие. „Луѓето се врзуваат за работите кои со години секојдневно ги опкружуваат, за некого тоа има лична вредност, сентиментална, субјективна. Овде се работи за општо, објективно, јавен интерес. Не се работи за носталгија кон објект за кој патетично се врзуваме и го сакаме затоа што е наш, затоа што ни буди спомени, не поврзува со младост и слично. Значењето е многу поголемо и е над личните чувства и убедувања“, изјави Раѓеновиќ Јовановиќ која додава дека и 40 години подоцна објектот сеуште има современ израз и идеална урбанистичка концепција и е одличен пример во нашата архитектура. Градскиот трговски центар е изграден во 1971 година, а главен авторот на проектот е познатиот, сега веќе починат архитект Живко Поповски кој важеше за голем професионалец и човек кој секогаш застануваше во одбрана на архитектурата.