ГРЧКИТЕ МЕДИУМИ РАСПAЛИЈА по интервјуто на ЗАЕВ за МИА

Добивај вести на Viber

Онлајн изданијата на грчките медиуми во текстот преземен од грчката новинска агенција за интервјуто на македонскиот премиер за МИА излегоа со наслови како: „Заев: Не влегуваме во НАТО, ако не се реши прашањето за името“; „Заев: Средба со Ципрас значи претстојно решение“; „Заев исклучува членство во НАТО без решение на името“; „Заев: Ако се сретнам со Ципрас, значи дека најдовме решение за името“; „Ако слушнете за средба со Ципрас, решението за скопското прашање е веројатно“.

Како што јави дописничката на МИА од Атина, грчката новинска агенција АНА-МПА, ги пренесува ставовите на премиерот Заев поврзани со разговорите за името, членството на Македонија во НАТО и евентуалната средба со Алекис Ципрас.

АНА-МПА на почетокот на текстот под наслов „Заев: ПЈРМ не може да се интегрира во НАТО, ако не се реши спорот со името“, пишува за тоа дека премиерот „ја исклучи можноста за членство на неговата земја во НАТО, ако претходно не се реши прашањето за името“.

– Зоран Заев оцени дека на последната средба што ја имаа во Виена на 30 март, министрите за надворешни работи на Грција и ПЈРМ, бил направен важен напредок во преговорите за изнаоѓање решение на прашањето за името и оцени дека на новата средба што ќе ја имаат министрите за надворешни работи на двете земји во Охрид, на 12 април, би можело да постојат позитивни разврски што би можеле да доведат и до негова средба со премиерот на Грција, Алексис Ципрас – објави грчката новинска агенција.

Текстот од АНА-МПА, објавен претпладнево, го презедоа речиси сите електронски изданија на грчките медиуми, но без дополнителни анализи или коментари.