Грција парализирана-поради штрајк запрени бродовите, возовите, автобусите

Добивај вести на Viber

Поради штрајк на вработени во поморскиот и железничкиот сообраќај запрен е сообраќајот на бродовите и возовите во Грција. Сите вработените во овие сектори ќе учествуваат во 24 часовен штрајк за 1 Мај - Меѓународниот ден на трудот. Штрајкот го организираа двата најголеми синдикати во земјата - синдикатот на вработените во приватниот сектор ГСЕЕ и во државниот сектор АДЕДИ. Денеска ќе има и голем протест пред зградата на Парламентот и од синдикатот ПАМЕ. Фериботните компании поради празниците планираат вонредни маршрути и измени на часовите на сообраќање со цел да ги опслужат патниците за време на првомајските и велигденските празници. Патниците, кои имаат билети за бродови до островите за 1 мај, се повикуваат да се поврзат со туристички агенти, а со железничката компанија треба да се консултираат патниците кои имаат билети за воз. И во Атина ќе има проблеми во сообраќајот бидејќи автобусите и тролејбусите ќе се движат од девет до 21 часот, по што ќе се вклучат во штрајкот. Метрото почнува со работа во девет часот, но нема да сообраќа до меѓународниот аеродром.