Добивај вести на Viber
Цените на становите наскоро ќе паднат за 15%, вели Цветко Грозданов, директорот на Акционерското друштво за стопанисување со станбен и деловен простор, за потраплот еВести. Според него, приватниците сега одат со маржи повисоки од 30%.
„Просечната цена по метар квадратен станбена површина, зборувам за градежна не за продажна, изнесува од 370 па се до 450 евра за квадратен метар, но сепак тоа е условено и од типот на градбата. На пример не е исто градба на колективна станбена зграда која е на 5 ката и зграда на 15 ката, а има разлика и во квалитетот на вградениот материјал. Доколку станува збор за луксузни станови сигурно дека и цената ке биде повисока . Кога на оваа цена ќе се додаде пазарната цена на земјиштето, комуналиите како и останатите трошоци, цената просечно би требала да се движи во рамките на цените кои ние како Акционерско друштво ги нудиме“, вели Грозданов во интервјуто.
Во однос на идните трендови на цените на становите, Грозданов вели дека тие допрва ќе поевтинуваат.
„Во иднина се очекува продажните цени да забележат пад од 10 до 15 проценти од оние кои ги има денеска на пазарот. Доколку се гасифицираат фабриките кои произведуваат градежни материјали, или превозот биде на метан и ако на пример се користат други ефтини енергенси треба да се очекува пад и на цените на градежните материјали“, вели тој.
И во Кварталниот извештај на Народната банка на Македонија за јули беше посочено дека цените на становите имаат надолна тенденција, додека расте нивната понудата на станови.
„Индексот на цените на становите бележи забавен пад од 0,5% на квартална основа, која што придонесе за мало забавување на годишна основа (пад од 4,7%, наспроти падот од 5,5% во првиот квартал на 2013)“, се наведува во документот на централната банка. Во услови на пораст на трошоците за градба од 2011 година, негативните придвижувања кај вредноста на станбените единици можат да се објаснат со повисоката понуда на пазарот на недвижности“ пишува во последниот извештајот на НБРМ.