Грција им помага со упатства на илегалните мигранти да влезат во Македонија
Објавено во: Балкан 15 Март, 2016
Грчките власти, со помош на вработените од невладини организации, им делеле флаери со упатства како да ги нарушат соседните граници и да влегуваат во Македонија.
Меѓу мигрантите кои вчера (14 март) упаднаа на македонска земја, беа откриени флаери на арапски јазик. На нив има и шема како да ја нарушат државната граница и да влезат на македонска територија. На летокот има карта на која се наведени патеките и начините на кои треба да се движат мигрантите. На нив е испишано и времето на поаѓање од Идомени (Сухово), кампот, кој се наоѓа недалеку од македонската граница.
Вчера попладне, според различни извори од Грција во Република Македонија илегално влегоа помеѓу 500 и 1000 мигранти. При преминувањето на Сува Река тие беа потпомогнати од службеници на невладини организации, кои прицврстиле и јаже за да можат да ја преминат реката.
Тројца од нив сепак се удавија. Мигрантите кои успеаја да ја преминат границата беа пречекани од армијата и полицијата во Гевгелиско село Моин.
На македонските полицајци им помагаа и полицајци од земјите кои испратија свои претставници во Република Македонија за да помогнат против илегалната миграција.
Македонските власти предупредија дека „сите илегални мигранти ќе бидат вратени назад таму каде што дошле“.
На еден од флаерите се наоѓало и името на поранешниот германски министер - 80-годишниот Норман Блум. Неколку дена тој е во кампот Идомени (Сухово) и тврди дека е таму од хумани причини.
Во изминатата 2015 година од Грција во Република Македонија пристигнаа над 750 000 мигранти. Сите тие беа транспортирани со автобуси или возови до пограничниот град Гевгелија. Од почетокот на оваа година до затворањето на „Балканскиот пат“ во почетокот на февруари од Грција во Македонија влегоа над 89 000 лица.
„Балканскиот пат“ официјално беше затворен за време на средбата на врвот ЕУ-Турција на 7-ми февруари.
Министерот за внатрешни работи на Австрија Јохана Микл-Лаитнер го поздрави Скопје за неговите напори во борбата против нелегалната миграција.
„Македонија до сега има направено повеќе за стабилноста на Европа, отколку некои земји-членки на ЕУ“, истакна Јохана Микл-Лаитнер.