Грција ќе крати само од високите пензии

Добивај вести на Viber

Намалувањето на пензиите во Грција нема како да биде избегнато, призна новоизбраниот социјален министер во Грција Јоргос Катругалос. Во договорот со доверителите е запишано намалување на пензиските трошоци со 3,5 милијарди евра до 2018 година, потсети тој пред локалното Real FM радио.

Намалувањето сепак ќе влијае само на високите пензии, како и дополнителните пензии кои добиваат некои категории пензионери во Грција, додава Greek Reporter.

Социјалниот министер е категоричен дека новата влада нема да ги намалува ниските и средните пензии. Како ниски тој ги утврди пензиите под 1000 евра, а средни - во опсег помеѓу 1000 и 1500 евра.

Катругалос додава дека властите ќе се обидат да најдат и начини да ги компензираат намалувањата и на високите пензии, како и други редукции предвидени во третиот спасувачки план. Тоа е основата на новата програма за управување на СИРИЗА - исполнување на барањата на доверителите, но и мерки за ограничување на негативните ефекти.

Предизвик пред владата ќе е промената и на даночниот систем што ќе претстои во наредните месеци.

Во меѓувреме грчкото Министерство за финансии потврди за "дупка" во приходите во буџетот. Во периодот јануари - август тие се со речиси 12% помалку од планираното. Тоа беше очекувано предвид капиталната контрола на банките во земјата.

Податоците покажуваат дека во разгледуваниот период во касата примиле 30,7 милијарди евра приходи, што е за 4,15 милијарди евра помалку од планираните 917 милиони евра од нив се несобраните даноци.

Во исто време грчката влада ги намали трошоците, вклучувајќи ги и оние за инвестиции. Во периодот на централната власт се потрошени 31,8 милијарди евра, наместо бараните во буџетската рамка за годината 36,6 милијарди евра.