Грците ги враќаат своите пари назад во татковината

Добивај вести на Viber

Откако трескавична тргнаа да ги изнесуваат своите пари од Грција поради економскиот колапс, Грците, особено оние кои живеат во странство, веќе размислуваат за купување акции и имот во татковината, привлечени од ниските цени и оптимизмот дека нивната земја сепак ќе остане во еврозоната, пишува Ројтерс. Инвеститорите и брокерите на недвижности велат дека интересот за недвижниотсектор од летото е зголемен и постојат знаци на забавување на масовното повлекување на капитал од земјата. „Направени се договори кои претходно беа незамисливи, но во моментов изгледаат логични, бидејќи и надворешниот свет почнува да не сфаќа сериозно", коментира аналитичарот Костас Казолидес кој работи со трансакции со имот во Грција и Кипар веќе 35 години. „Луѓето зборуваат за враќање и купувања. Постојат вили на Миконос кои се достапни за околу 30% од реалната вредност, бидејќи продавачите имаат финансиски тешкотии", додава тој. Стравувањата дека инвестициите и банкарските депозити ќе ја изгубат вредноста ако Грција  ја напушти еврозоната, ги одвраќаше меѓународните инвеститори од купување на евтини имоти и акции  изминатите години. Но коалиционата влада на конзервативниот премиер Андонис Самарас, која дојде на власт во јуни, даде позитивни резултати и ги смири стравувањата од банкрот и излегување на Грција од еврозоната. Податоци на консултантската компанија „Lipper“ покажуваат дека протокот на средства на грчкиот пазар на капитал, останува забавен во 2012 година до 17 милиони евра кон крајот на август, во споредба со 50 милиони евра во 2011 година и 42 милиони евра во 2010 година. И покрај овие причини за оптимизам, сепак се уште има многу фактори кои ги попречуваат инвеститорите, вклучувајќи ја одлуката на најголемата компанија во земјата „Coca Cola Hellenic“, да го премести своето седиште во Швајцарија, а своите акции - на Лондонската берза.