Гувернерката на српската Народна банка нападната во хотелска соба?

Добивај вести на Viber

Гувернерката на Народната банка на Србија Јоргованка Табаковиќ имала „блиска средба“ со провалник во нејзината хотелска соба во Милочер, Црна Гора, но повеќе информации за инцидентот не се објавени. Таа за српските медиуми сама го открила нападот кој се случил за време на економски форум во Црна Гора и додала дека е „чудно и загрижувачки тоа што се случило и што полицијата не излегува со дополнителни податоци“. Управата на црногорската полиција потврдила дека гувернерката доживеала „непријатност“ во хотелот „Маестрал“ во Милочер, за време на економскиот форум, а настанот се третира како грабеж во обид. Била известена и српската полиција, која од црногорските колеги добила информација дека „најверојатно станува збор за случаен упад на крадци во собата на гувернерката на Народната банка на Србија, а не за намерен обид токму таа да биде ограбена или нападната“. Табаковиќ изјавила дека во текот на ноќта се разбудила и го забележала провалникот кој претурал по нејзините работи, а потоа мирно ја напуштил собата. Тој излегол низ терасата, иако собата била на четвртиот кат. Таа не е уверена дека мотивот е кражба, со оглед на тоа што наводниот крадец не зел ништо од вредните предмети - ниту накитот опставен на масата, ниту мобилните телефони, ниту Ајпадот, ниту пасошот, ниту новчаникот - само мал неугледен несесер од дното на торбата во кој се наоѓале лековите за срце на гувернерката. „Не е непознато дека страдам од сериозно хронично срцево заболување, а секој на доручек можеше да види дека пијам лекови токму од тој несесер“, вели Табаковиќ. Не сака да прејудицира за мотивите, но вели дека е свесно оти заради нејзината работа на многумина им одговара да биде во состојба на страв. Сепак, најавува дека ќе продолжи да си ја работи својата работа како и досега.