ХАМАС МАЛТРЕТИРАЛ МАЛОЛЕТНИЦИ: Милитантите ги терале децата да гледаат видеа од злосторствата
Објавено во: Свет 29 Ноември, 2023
Израел тврди дека палестинската терористичка група Хамас ги малтретирала киднапираните деца.
Портпаролот на израелската влада Ејлон Леви изјави дека семејствата на заложниците раскажувале ужасни приказни за заробеништвото. Тој ја цитираше тетката на 12-годишното момче дека милитантите му се заканувале на нејзиниот внук со пиштоли додека тој плачел и го терале да гледа ужасни видеа од злосторствата на Хамас. Леви додава дека една баба рекла дека киднаперите се заканувале дека ќе ѝ ги убијат двата внука, на возраст од осум и 15 години, и им рекле дека никој не сака да се вратат дома во Израел.
„Не можам ни да почнам да замислувам колкав е психолошкиот ужас и терор низ кој поминаа“, рече тој.
Хамас бара траен прекин на огнот во Појасот Газа како предуслов за ослободување на заробените припадници на израелските одбранбени сили (ИДФ) во преговорите со Израел, јави денеска египетската телевизија Ал Кахера ал Ехбари.
Осама Хамдан, висок функционер на Хамас, во интервју за телевизијата Ал Арабија рече дека „сè уште е рано и тешко да се зборува за ослободување на заробените војници во услови на тековно страдање на палестинскиот народ и продолжување на израелската агресија“. Според него, „услов за преговори е крај на војната“. Хамдан потврди дека Хамас верува дека е можно продолжување на хуманитарниот прекин на огнот за уште неколку дена. Хамас на 7 октомври изврши напади на Израел, а потоа Израел почна офанзива во Газа.