Холанѓаните слетаа во Охрид, надлежните очекуваат 400 илјади туристи летово

Добивај вести на Viber

И годинава со леб и сол на охридскиот аеродром беше пречекана првата група туристи кои со специјален чартер-лет на тур-операторот „ТУИ Аркефлај“ дојдоа на одмор во Охрид. Овојпат станува збор за туристи од земјите на Бенелукс, главно Холанѓани. Според новиот охридски градоначалник, Никола Бакрачески, пријателството меѓу Охриѓани и туристите од Холандија датира повеќе децении. „Последните две години, благодарение на Амбсадата на Кралството на Холандија и агенциите, бројот на туристи од Холандија постојано расте“, посочи градоначалникот. Директорот на Агенцијата за промоција и поддршка на туризмот Јордан Трајков очекува зголемување на вкупниот број туристи од Холандија, а проценува и дека вкупниот број туристи од странство оваа година ќе ја надмине бројката од 400 илјади гости кои ќе летуваат во Македонија. Како одговор на обвинувањата за исплатата на субвенциите, Трајков појасни дека субвенциите за странските туристи се исплаќаат редовно, но само за вистинските туристи, а не за обичните патници односно нашите иселеници кои ги користат чартер-летовите само за да го посетат родниот крај. Тој посочи дека станува збор за сума од милион и 50 илјади евра, што на почетокот на мај оваа година ќе бидат исплатени како субвенции за 2012 година. Инаку, туроператорот „ТУИ – Аркефлај“ заедно со „Корендон“ се агенциите кои веќе трета година во Холандија и земјите од Бенелукс ја нудат Македонија како дестинација на своите летни туристички понуди. Ова лето двете агенции имаат зацртано реализација на вкупно 114 чартер-лета за Охрид со околу 20 илјади туристи. Минатата туристичка сезона холандските туристи оствариле вкупно 145.280 ноќевања или 17,9 проценти од вкупниот број реализирани ноќевања.