Хрватска ќе наплаќа „данок на шунд“, за класична музика 5%, а за рок 25%

Добивај вести на Viber

Хрватското Министерство за финансии се одлучи на нов потег, а тоа е враќање на данокот на шунд, пишува загребскиот весник „Јутарњи лист“, наведувајќи дека за сериозната музика ДДВ-то би било 5%, а за рокот и фестивалите дури 25%.

Пред членството на земјата во ЕУ нулта стапката на ДДВ, која важеше за книгите и театарските и кино билетите „заминува во историјата“, наведува весникот, укажувајќи дека веќе се знае оти за книгите ќе се применуваат привилегирани стапки на ДДВ од 5%.

Владата овие денови треба да одлучи и за привилегираната стапка на ДДВ на театарските, кино, музејските и концертните билети, односно за четири категории влезници кои во повеќето земји од Унијата се обединети во една категорија - „билети за културни настани“.

Независно од тоа за какви претстави, филмови или концерти станува збор, тие имаат иста стапка на ДДВ, најчесто привилегирана, потсетува „Јутарњи лист“, давајќи ги како пример Словенија со 8,5%, Австрија и Италија со стапка од 10%, Полска и Шпанија со 8%, Шведска и Холандија со 6%.

Исклучок од ваквата пракса е Велика Британија, каде нема привилегирана стапка на ДДВ-то за ниту еден културен настан.

Во предлогот хрватското Министерство се раководело според позитивната пракса, а и Министерството за култура дало препорака стапката на ДДВ-то на влезниците за сите културни случувања да изнесува пет отсто.

Со ваквиот став, укажува весникот, Министерството за финансии како повторно да го воведува социјалистичкиот „данок на шундот“, според чии одредби произледува дека дури и најлошите филмови на Жан Клод ван Дам, на пример, или најлошата театарска пиеса претставуваат уметност и култура, а концертите на Бијонсе, Роби Вилијамс или домашната група „Ладно пиво“ не.