Добивај вести на Viber
Од 1 јануари 2015 година Хрватска воведува данок на штедење. Сите камати на заштедите ќе се оданочуваат со стапка од 12%, објави потпретседателот на хрватската Влада и министер за регионален развој Бранко Грчиќ.
Тој додава дека станува збор за најниска стапка на ваков данок во Европа. Воведувањето на данокот на штедење хрватските власти го договорија со Европската комисија.
„Ќе биде лесно да се пресмета. За секои 100 куни приходи од камати, 12 куни ќе треба да и платите на државата“, вели Грчиќ.
И покрај критиките дека воведувањето на ваков данок може да го дестимулира штедењето, за хрватските власти тој беше неизбежен. Данокот на штедење е една од мерките со кои ќе се компензира помалиот приход во буџетот на единиците на локална и регионална самоуправа, кој е резултат на новата даночна политика, односно на зголемувањето на делот од личниот доход што не се оданочува.