Обновено: 50 нови вработувања во фабриката на „Техникс“ во Шуто Оризари

Добивај вести на Viber

На почетокот на новата индустриска зона во општина Шуто Оризари денеска беше поставен камен-темелник на погон за производство на опрема за рециклирање на отпад и за третман на отпадни води на компанијата „Техникс“ од Хрватска, инвестицијата тешка 2 милиони евра. За пет месеци треба да биде готова  фабриката за производство на најмодерна опрема и технологија која е во функција на заштита на животната средина. Во првата фаза, во компанијата под називот „Техникс“ Скопје ќе се вработат околу 50 луѓе. Министерот за животна средина и просторно планирање Абдилаќим Адеми ја поздрави инвестицијата на „Техникс“ и истана дека со изградбата на погонот за опрема за рециклирање на отпад и отпадни води и со негово стартување во голема мерка ќе се придонесе кон олеснување на процесот на воспоставување на одржлив систем за справување со отпад и заштита на водите кои се приритет за Македонија како земја со статус кандидат за член во ЕУ. Претседателот на компанијата „Техникс“, Ѓуро Хорват пак потенцираше дека оваа инвестицијата ќе значи иднина во делот заштита на природата , а најави и дека знаењето од Хрватска ќе биде пренесено и во Македонија, на македонските стручњаци. Тој истакна дека нивните 300 производи, кои ги развиле имаат добиено голем број светски признанија, а информираше и дека  „Техникс“ има свои фирми во Романија, Бугарија, Австрија, Германија. „Техникс“ има 20-годишно искуство во проектирање, производство, и инсталирање на разновидна опрема и постројки во решавање на проблемите за менаџирање и третман на отпадни води, управување со комунален цврст и неопасен отпад, како и други видови на отпад, вклучувајќи го и опасниот отпад, опрема и постројки за управување со нафтени деривати, контејнерски населби, типски и специјални контејнери и специјални производи, опрема и постројки, стои во личната карта на оваа компанија.