И оваа година Охрид најатрактивен за соседите, распродадени новогодишните аранжмани

Добивај вести на Viber

Охридските ресторани, хотели и кафулиња полни со резрвации за новогодишните празници токму пред  последните денови од старата 2012 година. Со наближувањето на датумот за дочекот на новата 2013-та година се зголемува и  исполнетоста на хотелите  што се должи на балканскиот менталитет односно одлуката за тоа каде да се минат празниците да се носи во последен миг. Цените на хотелските аранжмани за новогодишните празници слични на минатогодишните, од 99 до 160 евра, зависно од понудата, бројот ноќевања и категоријата на објектот.

Тридневен аранжман на база полупансион во хотелот „Метропол“ чини 147 евра, со вклучен дочек и новогодишно мени. Истиот аранжман во „Инекс Горица“ чини 139 евра, во „Силекс“ 143 и во „Климетица“ 135 евра. Хотелот „Белведере“ нуди тридневен аранжман за 149 евра од лице, со тоа што вклучува свечени новогодишни вечери и за 31 декември и за 1 јануари. Во „Милениум“ велат дека издадени се речиси сите соби и апартмани. Гостите кои ќе престојуваат во овој хотел ќе пристигнат од Грција, Бугарија, Србија и Македонија. Цената на дводневниот аранжман е 99, а на тродневните 139 евра.

Само дочекот на Новата година во хотелите ќе изнесува 30 евра од лице. Во познатите охридски ресторани цените на дочекот со свечено новогодишно мени слични на минатогодишните. Во „Далга“ дочекот на новата година ќе изнесува 45 евра со богато мени и неограничен пијалок, односно 25 за втората вечер без пијалок. Ресторанот „Света Софија“ нуди богато новогодишно мени со аперитив за 25 евра, со доплата за пијалок, додека втората вечер на влез ќе се наплаќа консумација од 1.200 денари, што гостите ќе можат да ја потрошат по свој избор. Во рестораните „Белведере“ и „Билјанини извори“ дочекот на новата година ќе чини 40 евра со десет евра пијалок, додека вечерата на 1 јануари ќе чини 25 евра, од кои пет евра за пијалок.

Дел од угостителите ќе работат според варијантата на отворен влез, со редовни цени на храната и пијалоците. Забавно ќе биде и во охридските кафулиња и ноќни клубови. Највеселата ноќ во „Објектиф“ ќе чини 600 денари со новогодишно мени, со доплата за пијалоците, додека во „Ликвид“ дискотеката „Парк“ дочекот ќе чини 990 денари, со консумација со три пијалоци и апетисани и овошје. Во ноќниот клуб „Хавана“ дочекот ќе чини 900 денари консумација со три пијалоци, додека во „Куба либре“ највеселата ноќ чини 50 евра, со богато мени на база шведска маса и неограничен пијалок.

Инаку, градот веќе е свечено украсен, особено централното градско подрачје, Плоштадот и Кејот на Охридското Езеро, а ќе има и организиран дочек на Новата година на Градскиот плоштад, со скромна, но весела програма.

Како што и се предвидуваше, најбројни и овојпат за новогодишните празници ќе бидат гостите од соседните земји од Србија, Бугарија, Албанија, Црна Гора, Грција, кои традиционално го избираат Охрид за новогодишните празници поради потврдената добра забава. Во Охрид ќе има и домашни гости, но најголем број од нив оние кои имаат свои станови и куќи така што не се очекува позначајна заработка за приватните станоиздавачи и издавачи на соби.