ИЛИНДЕН И АСНОМ ГИ ЧЕСТВУВААТ ЗАЕДНО: Вучиќ ја пречека претседателката Гордана Силјановска Давкова во манастирот Прохор Пчињски

Добивај вести на Viber

Претседателот на Србија Александар Вучиќ и претседателката на Северна Македонија Гордана Силјановска Давкова денеска го посетија манастирот Свети Прохор во Пчињско, каде што беа пречекани од голем број граѓани.

Силјановска Давкова положи цвеќе пред спомен плочата на Првото заседание на АСНОМ кое пред 80 години се одржа на денешен ден во манастирот Св. Прохор Пчињски.

Во говорот, таа посочи дека ова е битка за младите, битка за четвртата македонска Република--Оваа битка ќе ја добиеме само со европеизација на државата, со владеење на правото, со борба против корупцијата, со ефикасни институции, со компетитивна економија, со демократски вредности и демократска политичка култура, со човекови права и слободи, конечно, со функционални системи што ќе можат да се справат со пожарите, поплавите и другите елементарни непогоди. За да ја добиеме оваа битка, мора да ги вклучиме младите во секоја етапа на носење одлуки што се однесуваат на нив и на нивната иднина. Ние не смееме да носиме одлуки за младите без младите. Оваа битка е и нивна битка, ваша битка, што можете да ја водите само тука, во својата татковина. Оваа битка мора да започне уште денес и ние мора да ги вложиме сите наши лични и институционални капацитети. Вистинскиот патриотизам се докажува не со празни зборови, не со гола реторика, туку со работа, со труд, рече престедалката.

Во говорот се осврна и на соработката со стратешките партнери и европски пријатели, за кои кажа дека се врвен приоритет.

-Нашата Република беше зачната од европските идеали за слобода од тиранијата, еднаквост пред законот, братство меѓу луѓето и народите. Тоа нѐ прави еднакви наследници на врвните европски придобивки. И затоа, освен географски, ние и вредносно, политички и економски припаѓаме кон големото европско семејство. На нашиот пат кон полноправно членство во Европската Унија, сѐ уште се соочуваме со непринципиелни услови што постојано се менуваат. Но, знаеме дека меѓу земјите членки имаме многу пријатели коишто се застапуваат за нас и ја будат европската совест кон случајот со нашето маратонско интегрирање. Ние мора да им помогнеме со тоа што нема да отстапиме од зацртаниот европски пат. Тоа е и нашиот пат. Македонските институции се подготвени за европските реформи. Но, од нашите европски и стратешки партнери очекуваме разбирање и праведно деблокирање на процесот на преговорите. Нашето место беше и е во Европа, но со заштитен македонски идентитет, јазик, култура и историско паметење, меморија, рече претседателката.

Српскиот претседател истакна дека Илиндан е уште една допирна точка на која треба да ја заснова меѓуисебната понатамошна поврзаност

- Ја пречекав претседателката Гордана Силјановски Давкова. Оваа посета претставува одлична можност за зајакнување на партнерството и афирмирање на заедничките вредности со цел напредок и развој на целиот регион – рече Вучиќ на средбата.

Како што рече, манастирот Свети Прохор Пчињски е најдоброто место за оваа средба, бидејќи „ја симболизира врската меѓу Србија и Северна Македонија, вкоренета во заедничката традиција, култура и предизвикувачки историски околности што го обликуваа идентитетот на нашите народи“.