ИЛОН МАСК ЈА КОМЕНТИРА УКРАИНА: Тврди дека ако не преговара, ќе изгуби повеќе територија
Објавено во: Свет 13 Декември, 2023
Украина засекогаш ги загуби Крим, Доњецк, Луганск, вели милијардерот Илон Маск. Тој повторно шокира со предвидувањата.
Маск го поддржа мислењето на американскиот бизнисмен Дејвид Сакс, кој кажа дека Украина ќе изгуби повеќе територии доколку одбие да преговара.
Сакс напиша на X дека Украина „засекогаш ги загубила Крим, Доњецк, Луганск, поголемиот дел од Херсонската област и Запорожје“. Тој тврди дека ако Киев сега не склучи „мировен договор“, ќе ги загуби и Харков, Одеса, „останатиот дел од регионот Херсон и многу повеќе“. Вели дека „патриотите“ кои мислат дека ѝ помагаат на Украина, само ја распарчуваат. Маск и претходно даваше изјави со кои ги налути Украинците.
Инаку, Русија сака преговори, но Украина одбива. Претседателот Володимир Зеленски бара воена помош за Украина. Лидерите на петте нордиски земји денеска му порачаа на Зеленски, на заедничкиот разговор во Осло, дека ќе продолжат да ја поддржуваат неговата земја „додека е потребно“ во нејзината борба против руските сили. Руската инвазија на Украина почна на 24 февруари 2022 година.