Имало ли сепак пропусти: Стечајот на ТЕ-ТО стаса во ОЈО за организиран криминал

Добивај вести на Viber

Сите докази, изјави и наоди во предметот за стечајот на гасната централа ТЕ-ТО кој го оформи Основното јавно обвинителство сега ги разгледува Основното јавно обвинителство за гонење на организиран криминал, дознава Фактор. Истражната постапка е при крај по што оттаму ќе излезат со детали за случајот.

Станува збор за предмет кој беше отворен откако до Основното јавно обвинителство кривични пријави поднесе домашната компанија Топлификација АД од каде тврдат дека има незаконско постапување во носењето на одлуките за стечај. Обвинувањата беа дека во целиот случај вмешани се и адвокати, нотари, извршители и сопственикот на ТЕ-ТО, компанијата Битар холдингс. Се тврди дека процесот е воден незаконски со пропусти и дека има сомнежи за лажирани финансиски извештаи.

Овој предмет обвинителството го оформи уште во јуни лани, а во истовреме свои докази имаше и Управата за финансиска полиција. Сега неофицијално, документацијата е во обвинителството за организиран криминал и корупција, кој ќе гоима конечниот збор за обвинувањата. Не само за лажираните извештаи туку и за тврдењата од Топлификација АД според кои во планот за реорганизација на ТЕ-ТО е наведено дека од 2013 до 2017 година компанијата била условена да купува гас преку офшор фирма и да продава електрична енергија на домашна фирма која морала да ја продаде надвор од државата на дефинирана фирма. Според нив, ова е непазарно купување суровини и непазарно продавање што е школски пример за перење пари.

Топлификација е еден од најголемите доверители во ТЕ-ТО а со планот за реорганизација кој беше прифатен по стечајот, на ова друштво му се брише  90 отсто од побарувањето од 30 милиони евра. За тоа реагираат и акционери кои тврдат дека се оштетени од овој план.

Најголеми доверители во гасната централа беа Топлификација, Комерцијална банка, турската компанија Гама гуч, на кои пред стечајот ТЕ-ТО им должел над 40 милиони евра. Вкупниот долг кон таканаречените необезбедени доверители надминуваше 150 милиони евра, а меѓу нив има и други компании па и државни институции. На сите нив ТЕ-ТО треба да им врати само 10 отсто од сумата која им ја должи и тоа во два наврати.

А.Т.