Имаме поголем раст на платите од некои европски земји, а уште сме најсиромашни

Добивај вести на Viber

За 20 проценти пораснала просечната плата во земјава во последните десет години. Растот не е занемарлив, а ако се споредува со некои од европските земји дури е и импресивен. Сепак, тој показател не е единствен кога се анализира економската слика во земјите. Во соседна Бугарија на пример, платите за последните десет години (од 2009 до 2018 година) пораснале за неверојатни 87 проценти, ама оваа земја е една од најсиромашните во Европската Унија. Фактор го анализира растот на платите по земји, а неодамна свое истражуавње објави Европскиот синдикален институт.

Според податоци од македонскиот Државен завод за статистика, реалниот раст на платите од јануари 2010 година до јануари 2019 е 20 отсто. Или ако во првиот месец од 2009 година просечната нето плата изнесува 20.330 денари, во јануари годинава беше 24.517 денари. Во меѓувреме порасна и минималната плата која беше воведена токму во овој период. Раст на БДП со раст на платите е една од политиките на која се потпира актуелната Влада. Едно од ветувањата беше дека секој граѓанин во земјава ќе има плата од 500 евра (над 30.000 денари).

Еве го растот на просечната плата по години:

2010 година - 20.330 денари

2011 година -  21.029 денари

2014 година - 21327 денари

2016 година - 22.254 денари

2018 година - 24.025 денари

2019 година - 24.517 денари

Според податоците на Европскиот синдикален институт, Бугарија е лидер во растот на просечната плата со раст од 87 отсто за периодот по кризата. Во Романија платите пораснале за 34 отсто. Следат Полска - 30 проценти, Латвија - 21 отсто, Литванија, Словенија и Естонија - со 20 отсто и Чешка - 17 отсто. Десет земји доживеале пад на реалните просечни плати - Грција - 23 отсто, Хрватска - пад од 11 отсто, Кипар 7 отсто. Во  Португалија, Шпанија и Италија платите паднале за еден или два проценти додека во Белгија и Финска стагнираат.

Сепак и покрај растот, Макеоднија има една од најниските плати во регионот и во ЕУ, низок БДП по глава на жител, а сиромаштијата е над 20 отсто.

А.Т.