Индијците бараат затвор за Субрата Рој, ќе извисат ли македонските инвестиции?

Добивај вести на Viber

Индиското регулаторно тело – СЕБИ од Врховниот суд побара да издаде налог за апсење на првиот човек на „Сахара груп“ Субрата Рој и двајца негови директори поради тоа што групацијата не успеала да ги подмири своите долгови. Одборот исто така побара од судот да им забрани на Субрата Рој и неговите директори да ја напуштат државата. Од Врховниот суд најавија дека својата одлука ќе ја соопштат по 25-ти март. Минатата недела индискиот суд одби да даде дополнително време на компаниите на Субрата Рој за да си го подмират долгот. Како што пишуваа медиумите во Индија, првиот човек од Министерството за правда, Алтамас Кабир, кој претходно го продолжи рокот за наплата од ноември до крајот на првата недела од февруари, одби било какви понатамошни одолговлекувања. „Ако не се враќа износот, како што наложи судот, тогаш немате што повеќе да барате од судот”, изјави Кабир, додавајќи дека судот претходно даде пролонгирање на роковите само за да се осигура дека инвеститорите ги добија своите пари назад. Претходно Субрата Рој за медиумите тврдеше дека ги подмирил сите долгови, дека се неправедно обвинети и вистината ќе излезе на виделина. Што се случува со најавите за инвестиции во Македонија?! И додека сметките на индискиот милијардер остануваат замрзнати, од македонската Влада не го менуваат ставот дека  индиската инвестиција во земјава непречено ќе продолжи. Оттаму уште минатиот месец беше соопштено дека Рој ги исплатил обврските кои ги побаруваше СЕБИ и како што уверувала неговата компанија сите домашни и меѓународни проекти продолжуваат без какви било последици.

„Во изминативе десетина дена бевме во постојан контакт со највисоките претставници на Сахара. Од таму ни беше потврдено дека нивниот интерес и активности поврзани со проектите во Македонија на никој начин не се афектирани и работата продолжува непречено. Оваа нивна определба за сите домашни и меѓународни проекти е истакната и во официјалното соопштение објавено од страна на Сахара“, изјави тогаш директорот на Дирекцијата за ТИРЗ Виктор Мизо.

Субрата Рој македонската јавност го запозна како инвеститор кој двапати ја посети земјава и вети изградба на монденски туристички центар на Охридското Езеро, кај Љубаниште, потоа изградба на споменик на Мајка Тереза во центарот на Скопје и големи вложувања во земјоделскиот сектор на Македонија.