Инспекторите на терен, летово на мета туристичките агенции и угостителски објекти

Добивај вести на Viber

Летово ќе има засилени контроли на угостителските објекти за почитување на работното време. Ќе се проверува и работата на туристичките агенции околу почитување на договорите и законските прописи. Покрај редовните, министерот за економија Ваљон Сарачини најави и вонредни контроли од дежурни екипи, по средбата со директорот на Државниот пазарен инспекторат Виктор Дерменџиев. Само синоќа во Скопје, во угостителски објекти лоцирани на Ленинова, во Дебар Маало, Стара Чаршија и Јурумлери биле контролотани 25 објекти, од кои кај четири е констатирано нарушување на работното време. Казната е привремено затворање во траење од 10 дена ако прекршувањето е до половина час, 20 дена ако работел објектот меѓу половина и еден час повеќе од дозволеното и 30 дена ако работел повеќе од еден час над дозволеното, информираше Дерменџиев. Инспекторите влегле и во дискотеките на отворено во Градскиот парк и утврдиле дека само една има лиценца за работа на отворено, а другите имаат уплатено средствата и треба наскоро да ја добијат лиценцата. Надлежните побараа нови вработувања во инспекторатот. Според Сарачини ова е неопходно бидејќи кадарот е веќе повозрасен и не може да ја врши својата работа, особено не во раните утрински часови. „Државниот пазарен инспекторат треба да покрене иницијатива за ангажирање млад кадар кој ќе биде поактивен на терен“, нагласи министерот. Сарачини и  Дерменџиев аплеираа и до туристичките агенции да ги почитуваат договорите што ги потпишуваат со своите клиенти за одреден аранжман за да не се случува и цели групи туристи да покажат незадоволство од агенциите и да бидат на некаков начин измамени или оштетени. Лани било постапувано по 67 пријави, односно претставки од граѓани, а присилно се затворени 11 туристички агенции, а главниот проблем биле пријавите од граѓаните за неисполнување на договорите.