Интерес и посетеност на инфо-деновите во Охрид за можностите што ги нуди „Еразмус плус“
Објавено во: Мои пари 03 Ноември, 2015
Националната агенција за европски образовни програми и мобилност денеска во Охрид одржа инфо-ден, промотивна активност насочека кон презентирање на можностите што се нудат преку Програмата „Еразмус плус“ на Европската унија за образование, обука, млади и спорт, како и за начините за аплицирање и користење финансиска поддршка за разни проекти.
Претставници од Локалната самоуправа, образовните институции, невладиниот сектор и спортските клубови и асоцијации од Охрид можеа да се запознаат со начините и методите за за зајакнување на вештините и можностите за вработување, модернизација на образованието, обука и младинска работа, како и обезбедување услови за стекнување нови искуства.
Снежана Симоноска од Секторот за млади при Националната агенција за европски образовни програми и мобилност истакна дека Програмата „Еразмус плус“ им нуди на заинтересираните да партиципираат во програми во други држави за учење, работа, да посетуваат предавања или да се обучуваат и развиваат професионални вештини и компетиции.
Таа појасни дека за тековната година преку оваа програма за Република Македонија се одобрени 3,7 милиони евра, додека за наредната година тие средства се очекува да изнесуваат 4,7 милиони евра. Од охридската локална самоправа информираа дека некои од локалните образовни институции аплицирале со проекти и користеле средства од програмата, со забелешка дека тоа е мошне малку во споредба со можностите што се нудат, притоа повикувајќи ги останатите субјекти да аплицираат со издржани проекти.