ИСЛАМИСТИЧКИ ОРГАНИЗАЦИИ СЕ ЗАКАНИЈА СО НАПАДИ: Се плашат ли македонските граѓани да патуваат во Европа за празниците?

Добивај вести на Viber

Откако почна војната меѓу палестинската терористичка група Хамас и Израел, Ал Каеда и ИСИС ги повикаа своите следбеници да напаѓаат израелски, американски и еврејски мети. ИСИС повика на напади против Евреите насекаде, особено во Северна Америка и Европа. Властите во Европа покажаа загриженост дека исламскиот тероризам пак ќе оживее.

Граѓаните кои ги прашавме за мислење дали се плашат од напади, велат дека за празниците нема да патуваат во странство, затоа што немаат можности, но кога би имале пари, би ја искористиле шансата да прошетаат некаде.

„Јас не планирав да патувам, но би патувала, би одела да можам. Па од што да се плашам?“, вели Мирка Додевска, граѓанка.

И следната граѓанка смета дека нема некоја причина за загриженост.

„Да имам можности би патувала, не се плашам. Сме живееле со луѓе од различни националности и вери“, рече Богица Ваневска, граѓанка.

Третиот анкетиран граѓанин има одредена доза на скепса и вели дека ако патува, би одел на дестинации каде е мирно. Toj смета дека луѓето треба да ги избегнуваат најпопуларните европски метрополи каде и претходно имаше напади. 

„Би патувал, ама зависи каде. Би патувал таму каде што е помирно, може во соседството“, додава повозрасен граѓанин.

Александар Чоневски, од агенцијата Игуана травел од Скопје вели дека интересот за патување не е намален. Дури додава дека има граѓани кои си уплаќаат за одмори во 2024 година.

„Турите за Шпанија, Португалија, Италија си течат, останува и други да се реализираат, има интерес и за Истанбул. Не сме забележале да има некакви промени. За Нова година нудиме дочек на Копаоник, така што веќе има уплати“, рече Чоневски.

Од агенциите во внатрешноста велат дека страв за патување нема, туку пресудни се парите и навиките на луѓето. Многу македонски граѓани Новата година ќе ја дочекаат во Грција, Италија или во некоја друга земја.

Минатиот месец Тунижанец изврши напад во Брисел. Тој уби двајца шведски навивачи. Во октомври, во францускиот град Арас, жител на руската република Ингушетија уби професор во средно училиште. Полицијата спречи и напад во Милано, Италија. Пред неколку дена Еврејка во Лион беше избодена во стомакот.

foto freepik.com