Истанбул врие-Ердоган го затвори центарот на градот

Добивај вести на Viber

Многубројни полицајски сили за борба со безредија се распоредени на плоштадот Таксим и булеварот Истиклјал, како и бројни водени орудија, соопшти репортер на ДПА.

Властите забранија секакви собири на плоштадот Таксим во Истанбул и мобилизираа приближно 25.000 полицајци за да го блокираат пристапот до плоштадот. Во реонот се донесени 50 водени орудија, а исто така и пожарникарски возила и возила на брзата помош.

Турскиот премиер Реџеп Таип Ердоган ја критикуваше намерата да се организираат демонстрации за одбележување на првата годишнина од протестите во паркот Гези.

Полицијата добила јасни наредби денеска да не дозволи демонстранти на плоштадот Таксим во Истанбул, изјави Ердоган, цитиран од весникот на англиски јазик „Хуриет дејли њуз“.

Ердоган ги повика граѓаните да не земаат учество на планираните протести.

Движењето Солидарност за Таксим, кое минатата година ги предводеше протестите во Турција ги повика своите следбеници повторно да излезат на улиците.

-Нема да можете да отидете на тие места, како што можевте минатата година бидејќи полицијата доби безусловни наредби да не дозволи демонстранти, рече Ердоган на церемонијата на отворање на општинска зграда во Истанбул.

-Тоа не е екопротест, рече тој, додавајќи дека движењето исламскиот проповедник Фетула Ѓулен од САД, исто така, стои зад протестите.

Ердоган ја обвини и главната опозициска Републиканско народна партија дека ги поддржува протестите и се обидува преку насилство и вандализам да „ја покрие дупката во својата сопствена политика“.