Истекува рокот за поднесување барање во катастар за трансформација на корисничко право

Добивај вести на Viber

Истекува рокот за поднесување барање до Агенцијата за катастар на недвижности за трансформација на корисничкото право на градежното неизградено земјиште во право на сопственост по сила на закон.

Со измените и дополнувањата на Законот за приватизација и закуп на градежно земјиште во државна сопственост од септември 2015 година, се воведе посебна постапка со која се овозможи на поранешните сопственици на градежно неизградено земјиште кои не поднеле барање за приватизација до 15 декември 2014 година, да можат да поднесат до Агенцијата за катастар на недвижности пријава за промена на правото на користење.

„Започнувајќи од септември 2015 година до денес, 1447 граѓани ја искористија оваа можност и корисничкото право го трансформираа во право на сопственост во брза и ефикасна постапка. Ги повикуваме сите граѓани кои се корисници на градежно неизградено земјиште кои не поднеле барање за приватизација до Управата за имотно-правни работи заклучно до 15 декември 2014 година, да ја искористат оваа можност и да поднесат барање до Агенцијата за катастар на недвижности заклучно до 15 јуни 2016 година. Со оглед дека се зголеми бројот на барањата за трансформација на корисничкото право во право на сопственост, шалтерите во Центарот на катастар на недвижности - Скопје ќе работат со продолжено работно време до 19 часот, од денеска па до среда“ - информираат од Агенцијата за катастар на недвижности.

Постапката за поднесување барања е многу едноставна, па така покрај Пријавата која ја има на самите шалтери, граѓаните ќе треба да приложат и доказ за идентификација за подносителот на пријавата (фотокопија од лична карта или патна исправа, правната основа, односно актот врз основа на кој е стекнато правото на користење на катастарската парцела (закон, пресуда, договор, решение, одлука од надлежен државен орган, поседовен лист и др,  доказ од органот надлежен за утврдување правен статус на бесправно изградени објекти дека не е поднесено барање за утврдување правен статус на објектот на катастарската парцела која е градежно неизградено земјиште, а за кое се однесува пријавата. Потребен е доказ за платен надоместок за имотниот лист од катастарската парцела, за уверението за историски преглед на извршените запишувања во катастарот на недвижности и за запишувањето во катастарот на недвижностите и Агенцијата за катастар на недвижности по службена должност ќе обезбеди доказ од Управата за имотно-правни работи дали за градежното неизградено земјиште за кое е поднесена пријавата во Kатастарот веќе е поднесено барање за приватизација на градежно земјиште до Управата за имотно-правни работи.