Источногерманските години кои го формираа Путин

Добивај вести на Viber

Секој кој би сакал да го разбере рускиот претседател Владимир Путин денес, треба да ја знае приказната за тоа што се случило со него во една драматична ноќ во комунистичка Источна Германија пред четврт век, пишува во својата анализа BBC. Денот е 5-ти Декември 1989 година, градот е Дрезден. Минале едвај само неколку недели откако паднал Берлинскиот ѕид . Комунизмот во Источна Германија умира брзо и моќта на народ изгледа неодолива. Масата влегла во седиштето на тајната полиција на ДДР во Дрезден, а некогаш моќната Штази делувала беспомошно. Помала група демонстранти одлучила да замине преку улицата и да влезе во локалното седиште на КГБ. Стражарот веднаш заминал дома. Но набрзо потоа, излегол службеник на КГБ. Нешто поситен, но видно одлучен и видно нервозен. "Не се обидувајте да влезете на сила во оваа зграда. Моите пријатели се вооружени и имаат дозвола да пукаат доколку е тоа потребно", рекол тој. Групата се повлекла. Но, службеникот добро знаел дека ситуацијата е многу сериозна. Го повикал заповедништвото на Црвената армија и побарал заштита и поддршка од тенкови. Одговорот го променил засекогаш. "Не правиме ништо без наредба од Москва. А Москва молчи". Од тогаш, изразот "Москва молчи" го прогонувал младиот службеник, кој заканувачки, но беспомошно гледал како револуцијата го руши неговиот свет. Денес, направил сè за тој да стане Москва, руски претседател, премиер и што уште не. Меѓу документите во архивите на Штази во Дрезден има писмо од Путин, во кое тој ги моли за помош Штази за усвојување на телефон за нивен доушник. "Мислам дека неговите години минати во Германија се клуч за да го разберете Путин. Без нив денес би имале еден друг Путин и една друга Русија", вели германскиот биограф, Борис Рајтшустер. Лекцијата од тој 5. декември Путин не ја заборавил никогаш. Таа ноќ му покажала колку се кревки политичките елити, и колку лесно народот може да ги отстрани од власт. За неговото делување во Источна Германија малку се знае. Неговата тогашна сопруга Људмила, истакнала дека сепак им било убаво: "Животот во Дрезден беше многу поразличен од тој во СССР. Улиците беа чисти, луѓето ги чистеа прозорите еднаш во седмицата", рекла Људмила, но додала дека им завидувала на германските соседи. "Судејќи по тоа како живееја, вработените во Штази имаа подобри плати од нашите. Се обидувавме да штедиме за да купиме автомобил", рекла Људмила во интервју во 2000. година, како сопруга на тогаш новиот извршител на должноста - претседател на Русија. Еден колега на Путин се потсетил дека тој со часови ги читал западните каталози за да остане во тренд и дека уживал во својот "мал рај". "Стандардот во ДДР беше подобар отколку во СССР. Покрај тоа, во Германија постоеја повеќе различни партии и струи, иако беа под цврстата рака на комунистичката партија", се потсетил Владимир Усољцев и додал дека "во Русија Путин изградил политичка структура слична на таа во ДДР". Неговиот мал рај почнал да се претвора во пекол На почетокот на ноември, стотици граѓани на Источна Германија побарале азил во Западна Германија. Им бил дозволен влез преку вагони. Во Дрезден, огромна маса на луѓе се обидела да го пробие кордонот и да се качи на возот. "Мислевме дека насилството е неизбежно. Шефот на полицијата рече дека ситуацијата е невозможна", се потсетува тогашниот комунистички градоначалник на Дрезден, Волфганг Бергхофер. Командантите на тенковските единици на Црвената армија кои биле сместени во градот, јасно му кажале дека "ќе влезат во акција доколку Москва така нареди". Од тогаш станувало само полошо. Падот на Берлинскиот ѕид, масата која влегува со Штази, Михаил Горбачов кој не сака да прати тенкови, Путин и неговите колеги во паника палеле документи во канцелариите на КГБ. Две седмици подоцна, Хелмут Кол во Дрезден одржал историски говор. Го пофалил Горбачов што не пратил тенкови, а обединувањето изгледало неизбежно. Но, тој говор бил важна лекција за Путин. Кол користел зборови како "татковина" и други патриотски изрази, кои практично биле забранети во Германската политика од падот на нацизмот. Враќање без ништо Имплозијата на Источна Германија го урнала и семејниот живот. Пријателите и колегите од Штази изгубиле сè, еден од клучните контакти на Путин извршил самоубиство... Путин почнал да размислува да се врати дома. "Се врати во Ленинград. Личеше како да сака да ѝ служи на својата татковина, но немаше што да покаже. Се врати во земјата која не ја препознаваше и не сакаше да ја прифати", рекла биографката Маша Гесен, жестока противничка на Путин. Сега, кога масата е повторно на улиците на Киев и Москва, старите стравови повторно се јавуваат. Тој се сеќава дека промени не се прават преку сила, туку преку емоции. Во Дрезден видел дека љубовта кон татковината и желбата за слобода се помоќни од силата и комунистичката идеологија. Како што пишува на почетокот, за да знаеме што ќе направи Путин, треба само да ја погледнеме неговата биографија. Едно е сигурно. Додека е Владимир Путин на власт, Москва нема да молчи! К.К.