ИТАЛИЈА НЕ Е ЗЕМЈА ЗА МЛАДИ ГОТВАЧИ: Масовно се селат и на само 25 години заработуваат и по 7.000 долари

Добивај вести на Viber

Како и многу млади луѓе кои растат на Сардинија, Давиде Сана ја сакаше италијанската кујна и сакаше да има успешна кариера како готвач. Но, за да го стори тоа, тој мораше да се пресели во Њујорк.

Сана работел во кујните на медитеранскиот остров и во северна Италија четири години, почнувајќи од само 19 години. Во напорната летна сезона, тој беше на шпоретот секој ден два месеци, без пауза.

Потоа, колега готвач му даде контакт од ресторан кој бара готвачи во Њујорк, рече Сана. Тој прифати без да размисли, наведува Ројтерс.

Во изминатата година, 25-годишниот Сана готвеше во Piccola Cucina, италијански ресторан во блескавата област СоХо на Менхетен, дом на дизајнерски бутици и врвни уметнички галерии. Во Њујорк, тој заработува 7.000 долари месечно, работејќи 50 часа неделно.

„Овде има редовни договори, ништо „црно““, рече Сана, користејќи го италијанскиот сленг за непријавена работа. „А, ако работите уште една минута повеќе, ќе бидете платени за тоа. Во Италија не е така.

Италијанската храна е позната низ целиот свет, но многу талентирани млади готвачи, со надеж дека ќе направат кариера во својата земја, се фрустрирани од ниските плати, недостатокот на заштита на работната сила и слабите изгледи. Од лансирањето на единствената европска валута пред 25 години, Италија е најбавната економија во еврозоната.

Моменталниот одлив на италијански готвачи поради тешките услови дома не е нов феномен.

Бројот на млади Италијанци кои заминуваат да бараат работа во побрзо растечките економии, постојано се зголемува со децении - иако трендот накратко беше прекинат од пандемијата на Ковид-19. Емиграцијата и ниската стапка на наталитет придонесоа за растечка демографска криза: 59-милионското население на Италија се намалува.

Голем дел од емиграцијата доаѓа од медитеранските острови Сицилија и Сардинија, како и економски неразвиениот југ на Италија - „мецоџорно“.

KAДЕ СЕ ГЛЕДАМ СЕБЕ СИ ПО „ПЕТ ГОДИНИ“? НЕ ВО ИТАЛИЈА!'

Роберто Џентиле, 25-годишен готвач од Сицилија, работеше во последните две години готвејќи француска храна во Le Suquet, ресторан со две ѕвезди Michelin во близина на Тулуз, по претходните работни места во Британија и Шпанија.

И покрај неговата страст за италијанската кујна и сентименталната желба да се врати во она што Италијанците го нарекуваат Bell Paese (убавата земја), Џентилe рече дека економските дестимулации се премногу силни за да се размислува за враќање.

„По стекнување искуство во странство и достигнување високо ниво, би се надевале дека ќе се вратите во Италија и ќе најдете соодветна улога и плата, но тоа не се случува“, рече тој. „Каде се гледам себеси за пет години? Не во Италија!