Италијански компании заинтересирани за гасификацијата на Македонија

Добивај вести на Viber

Проектите во инфраструктурата и енергетиката што треба да се реализираат во следните 3-5 години го привлекоа вниманието на италијанските инвеститори, кои денеска на бизнис форум во Скопје се запознаа со инвестициските можности во Македонија. Министерот за транспорт и врски ги повика да вложуваат во земјава, а особено да се пријават на огласите за претстојната гасификација на земјата. „Повратот на профит е многу висок, очекувам дека ќе имаме огромен интерес од компаниите. И веќе има голем интерес од повеќе земји во Европа и надвор од Европа. Рокот за концесии е 20 години, а очекуваме приклучувањето на објектите да биде во периодот помеѓу 2015 до 2019 година. Критериумите за пријавување не се високи, а тоа беше и нашата крајна цел да имаме поголема конкуренција“, рече Јанакиески. На бизнис форумот учествуваа 30 компании од Италија и 40 од Македонија, кои ја испитаа можноста за меѓусебна соработка. „Денес слушнав одлична вест. Наскоро ќе започне да сообраќа директната авионска линија Скопје-Рим. Тоа е одлична вест за Коридорот 8 и се надевам дека освен преку воздушна линија, поврзувањето меѓу двете земји наскоро ќе се одвива и преку патна инфраструктура“, рече италијанскиот амбасадор Ернесто Масимо Белели. Според него, патното поврзување на двете земји ќе ги зголеми можностите за економска соработка.