Италијанскиот министер за одбрана: Ако руските тенкови влезат во Киев, ќе започне Трета светска војна
Објавено во: Свет 28 Јануари, 2023
Италијанскиот министер за одбрана Гвидо Крозето на средбата со неговиот француски колега Себастиен Лекорну зборуваше за ситуацијата во Украина.
Француското и италијанското министерство за одбрана соопштија дека средбата траела околу еден час и е опишана како пријателска.
„Важно е армијата на Италија и Франција да соработуваат за иднината. Покривме голем број прашања почнувајќи од источниот фронт и она што се случува во Украина. Се договоривме дека војната што ја започна Русија е најсериозната закана за мирот и стабилноста на Европа од крајот на Втората светска војна“, рече италијанскиот министер.
За време на изјавата за медиумите, Крозето зборуваше за можноста за нова руска офанзива, пренесува Анса.
„Третата светска војна може да започне во моментот кога руските тенкови ќе пристигнат во Киев, а со тоа и на границите на Европа“, рече министерот.
Инаку, покрај за ситуацијата во Украина, министрите разговарале и за проблемите во Медитеранот.