ИЗБОРИ: 5 гласа за Обама=5 гласа за Ромни

Добивај вести на Viber

Десетте гласачи во селото Диксвил Ноч, во државата Њу Хемпшир, кои традиционално почнуваат први со гласање на претседателските избори во САД, не можеа да одредат кој е победникот во трката за Белата куќа, за прв пат во историјата, соопштува Франс прес. Во полноќ по локално време (05.00 по Гринич) Танeр Тилотсoн, првиот од 200-те милиони гласачи во САД, го спушти ливчето во дрвената гласачка кутија. „Гласав за Барак Обама", изјави 24-годишниот морнар. По пребројувањето на гласовите, се покажа дека пет лица гласале за Обама и исто толку за противникот Мит Ромни. Селото Диксвил Ноч, се наоѓа во една шума на 30 километри јужно од канадската граница и е едно од двете мали изборни единици во државата Њу Хемпшир, кои ги отворија избирачките канцеларии на полноќ по локално време, за да може жителите да ја одржат долгогодишната традиција и да гласаат први во САД. Потоа избирачките места таму се затворија за шест часа подоцна жителите на останатиот дел од државата да се разбудат и да почнат со гласање. Во втората изборна единица во Њу Хемпшир, во селото наречено Хартс Локеишн,  Обама доби 23 гласа, Ромни - 9, а  Гери Џонсон - еден глас.. Триесет и три гласа беа поднесени за 5 минути и 42 секунди, соопштија американските медиуми. Њу Хемпшир е една од седумте држави во кои се смета дека гласачите до последен момент немаа одлучено за кого да гласаат, пренесоа агенциите. Изборниот закон во државата им овозможува на малите населени места со население под 100 лица да ги отворат гласачките места уште во првата минута по полноќ. Во 2008 година, Обама стана првиот демократ кој доби гласови во Диксвил Ноч, чии жители дотогаш гласаа само за републиканците. Обама доби 15 гласа, а Џон Мекејн - само шест.