Изненадување: Поништен тендерот за земјиштето кај „Веро“

Добивај вести на Viber

Тендерот за продажба на атрактивната локација кај НБРМ по цена од 71 денар за метар квадратен се поништува, одлучи Mинистерството за транспорт и врски. Одлуката за отуѓување на градежната парцела од 2.855 метри квадратни сепак не е поништена заради ниската цена, туку затоа што во меѓувреме три лица се пријавиле дека поседуваат дел од земјиштето. Ова градежна парцела на тендерот минатата недела ја купи единствениот понудувач – Друштвото за трговија промет и услуги „Амадеус Стоун ДООЕЛ“ од Скопје. На локацијата, оваа компанија требаше да изгради хотел на седум ката со приземје, поткровје и подземен паркинг, а условот беше фасадното решение на објектот да биде во барок стил. Ниската почетна цена на земјиштето од само 61 денар за квадратен метар предизвика реакции во јавноста, а градоначалникот на Центар Андреј Жерновски побара лицитацијата да се поништи. Се до денеска, Министерството за транспорт и врски не гледаше никаков проблем во продажбата на локацијата, а во последното соопштение објавено вчера и јавно го запраша Жерновски „врз основа на кој член од Законот за градежно земјиште бара поништување на јавното наддавање, дали е свесен дека доколку се поништи истата, државата ќе треба да плаќа казни, предвидени со законската регулатива и го покануваме да каже што е незаконско во постапката за отуѓување на земјиштето?“.