ИЗНЕНАДУВАЊЕ: Зоран Јолевски – нов министер за одбрана?
Објавено во: 07 Јуни, 2014 20:09
Досегашниот преговарач на Македонија во спорот околу името, амбасадорот Зоран Јолевски ќе биде министер за одбрана во новата македонска Влада, објави ТВ Алфа.
Иако во изминатите неколку дена како најсериозен кандидат да застане на чело на ова министерство се споменуваше Емил Димитриев, Алфа повикувајќи се на „највисоки извори вклучени во преговорите“ тврди дека токму Јолевски ќе дојде на оваа важна позиција.
Назначувањето на Јолевски за министер за одбрана ја остава слободна важната позиција - преговарач во македонско-грчкиот спор околу името. За сега нема информации кој би можел да ја преземе оваа функција.
Во замена за Министерството за одбрана, ДУИ го доби ресорот образование, на чие чело според досегашните информации ќе застане Абдилаќим Адеми, досегашниот министер за животна средина.
Според Алфа, освен Јолевски, министерски фотелји ќе добијат и:
Зоран Ставрески - вицепремиер и министер за финансии, Гордана Јанкуловска - министер за внатрешни работи, Никола Попоски - министер за надворешни работи, Аднан Јашари - министер за правда, Беким Незири - министер за економија, Никола Тодоров - министер за здравство, Диме Спасов - министер за труд и социјална политика, Абдилаќим Адеми - министер за образование, Михаил Цветков - министер за земјоделство шумарство и водостопанство, Иво Ивановски - министер за информатичко општество и администрација, Миле Јанакиески – министер за транспорт и врски, Елизабета Канческа - Милевска - министер за култура, Лирим Шабани - министер за локална самоуправа, Нурхан Изеири - министер за екологија, Веле Самак - министер без ресор, Бил Павлески- министер без ресор, Џери Наумов - министер без ресор, Горан Мицковски - министер без ресор, Висар Фида - министер без ресор, Неждет Мустафа - министер без ресор, Фурхан Чако - министер без ресор, Владимир Пешевски - потпретседател на влада, Муса Џафери - потпретседател на влада, и Фатмир Бесими - потпретседател на влада. Доколку овие информации се точни, новата Влада ќе има два члена повеќе од досегашната, и тоа плус двајца министри без ресор.
