Добивај вести на Viber
Кон средината на годинава ќе започнат градежните работи на реконструкција на автопатската делница Велес - Скопје, најави министерот за транспорт и врски Миле Јанакиески.
„Во финална фаза е изборот на градежна компанија и надзор. Очекуваме кон средината на оваа година да почнат градежните активности“, вели Јанакиески.
Автопатската делница Велес - Катланово е долга 23,5 километри, а се проценува дека градежните работи ќе чинат околу 8 милиони евра. Претходно веќе беше реконструиран автопатот во обратен правец Катланово - Велес.
На јавниот повик за изведба на реконструкцијата се пријавиле три компании, оценката на нивните понуди е веќе завршена и е испратена до Делегацијата на ЕУ во Скопје.
Најдоцна до септември следната година треба да бидат зајакнати и обновени и 13 моста по трасата на делницата Велес-Катланово на Коридорот 10. Нивната обнова ќе чини 8,6 милиони евра, а парите се обезбедени од НАТО преку Проектот за обнова на мостовите во Македонија.
„Моментно веќе се работи на реконструкција на три од планираните 13 мостови. Градежните работи се одвиваат согласно динамиката. Комплетната реконструкција треба да заврши до септември 2015 година“, најави Јанакиески, кој денеска ја посети локацијата каде во тек се активности за обнова на мостовите на патниот правец Велес-Скопје кај штипската клучка.
Претходно во соработка со НАТО во тек на првата и втората фаза од проектот беа реконструирани 51 мост со должина од 4.090 метри, со инвестиција од 23 милиони евра.