Јанева останува незагрозена, во првиот мобилен немало „ништо посебно“
Објавено во: Македонија 31 Јули, 2019
Во првиот мобилен телефон кој и беше одземен на специјалната обвинителка Катица Јанева во случајот „Рекет“ не било најдено „ништо посебно“, потврдиле од Обвинителството за гонење организиран криминал и корупција за Дојче Веле.
За вториот мобилен, кој првично се водеше дека е загубен, односно дека е во Белград па потоа пронајден кај сестрата на девојката на синот на Јанева, веќе е познато дека, како што вели обвинителката Вилма Рускоска, нема ништо релевантно, односно бил комплетно форматиран и со нов ај клауд.
Според тоа, од досега обезбедените искази и сознанија, немало докази кои би можеле да ја загрозат Јанева во случајот што го истражуваат и засега истиот се концентрира само на двајцата веќе обвинети.
Во меѓувреме на површина исплива и информацијата дека боледувањето на специјалната обвинителка со кое таа четири дена не доаѓаше на работа во СЈО го издала директорката на психијатриската болница во Негорци, Љуба Цилкова. Истата докторка испадна дека била сопруга на лице вработено во приемното одделение на СЈО.