Јавно-приватно партнерство пред распаѓање во слободните индустриски зони

Добивај вести на Viber

Јавно-приватното партнерство на државата со турската компанија Фидес Сун Енерџи за изградба на фотоволтаични централи, потпишано минатата година, е пред распаѓање. 

Договорот што Дирекцијата за технолошко-индустриски развојни зони го постигна во март минатата година е раскинат со одлука донесена минатата година од Владата за изградбата на фотоцентралата во Струга.

Неофицијално, нема никакви активности од турскиот инвеститор ниту во индустриската зона во Струмица, иако овој договор не е раскинат. Фотоцентрали требаше да се градат и во другите индустриски зони под надлежност на Дирекцијата за ТИРЗ, но договори не се склучени. 

Во меѓувреме беше склучен и договор за јавна набавка од страна на Дирекцијата за ТИРЗ со градежната компанија  „Зобек Мининг Груп“ која што за речиси 7 милиони евра  требаше да изврши „уредување и подготовка на земјиште наменето за јавно-приватно партнерство за поставување на фотоцентрали“. Според договорот, оваа компанија, на сметка на државата, требаше да го уредува и подготвува непристапното земјиште во зоните Скопје 1, Скопје 2, Штип, Прилеп, Струмица и Струга за потоа таму да никнат фотонапонски централи. 

Директорот на Дирекцијата за ТИРЗ, Гоце Димовски, ни изјави дека државата согласно одлуката на Влада ја започнала постапката за спогодбено раскинување за да не биде оштетена од раскинувањето на ова јавно-приватно партнерство. 

-  До турската компанија „Фидес“ е доставена спогодбата за раскинување на договорот за Струга согласно одлуката на Влада се со цел потпишување од нивна страна, а за Струмица ние ја наплативме тригодишната земјишна такса за отстапување на земјата на приватниот партнер за да бидеме законски чисти. Од кога сум директор, досега не е извршена никаква работа од страна на „Зобек Мининг Груп“ за рамнење на земјиштата, со што не е исплатено ништо кон нив. Тоа со „Зобек Мининг Груп“ е рамковен договор и ако не сработат ништо, ништо нема ни да им се плати, вели Димовски.

Лани во рамки на повикот беа доставени две понуди за изградба на централите - една од избраната компанија, како и една од израелско – кинески конзорциум. Турската компанија требаше да изгради фотонапонски електроцентрали во двете зони со вкупна моќност од близу 8 мегавати. 

10 отсто од приходите остварени од производството на електричната енергија компанијата беше обврзана да ги уплаќа во државниот Буџет, а годишниот наем за земјиштето што требаше да го плаќа е само 40 денари од метар квадратен.

А.К.