ЈСП пак ќе се обиде да воведе „паметни“ билети

Добивај вести на Viber

По петти пат ЈСП распиша меѓународен оглас за набавка и монтирање на систем за автоматска локација на автобусите и за електронски систем за наплата на билетите. Избраната фирма ќе има обврска двата системи да ги воведе за помалку од 46 месеци. Проценетата првична вредност на проектот е околу два милиони евра, објави „Дневник“. Досега пропаднаа четири тендери за да се воведе ваков систем, а според надлежните, причината за неуспехот е во тоа што системот е сложен и потребно е време технички да се дизајнира тендерот. Овојпат од ЈСП се уверени дека тендерот ќе биде успешен и оти ќе добијат систем што во голема мера ќе го модернизира јавниот превоз во Скопје. Со автоматската локација, патниците на автобуските стојалишта на електронски табли ќе добиваат информации за колку време ќе стаса автобусот што го чекаат. Возилата ќе бидат следени преку сателит и информациите ќе се проследуваат во реално време. Избраната фирма ќе има задача да постави 40 информативни дисплеи на автобуските постојки, преку кои патниците ќе добиваат информации за пристигнувањето на автобусите. Во сите автобуси ќе треба да постави ГПС-уреди за сателитско следење на возилата и да опреми диспечерски центар за нивно следење, кој ќе биде сместен во рамките на Студентскиот дом „Kузман Јосифовски-Питу“. Со системот за електронска наплата, односно со воведувањето таканаречени „паметни“ билети, ќе се избегнат билетите од хартија и ќе се скрати времето на влегување на патниците во возилата. Граѓаните што се возат со јавниот превоз ќе си купуваат електронски припејд-картички, кои ќе ги дополнуваат со толку пари колку што сакаат, а при влегувањето во автобус ќе ја приближат картичката до читач, кој од неа ќе им одземе сума колку што чини возењето.