Како да се задржат младите во руралните средини?

Добивај вести на Viber

Во регионот на Свети Николе-Штип се реализира проектот „Брендирање на руралните бизниси со цел задржување на младите во руралните области“, финансиран од страна на Програмата за развој на Обединетите Нации (УНДП) преку програмата за Поддршка на Социјално Претприемништво за Млади (Youth Social Entrepreneurship Support Programme). Проектот се имплементира од страна на Здружението за развој, претприемништво и претприемачко учење „Марвел-АДЕЕЛ“ во партнерство со компанијата СИ комуникејшн од Скопје и Општина Свети Николе. Главната цел на проектот е да се зголеми бројот на претприемачки бизниси во овој регион преку идентификација на руралните традиционални бизниси и традиционални вештини за обработка на предмети со највисок потенцијал и нивно претворање во профитабилни компании. Развојот на руралните традиционални бизниси во претприемнички бизниси треба да им овозможи на младите луѓе од микро-регионот Свети Николе-Штип подобри и поголеми шанси за препознавање на вистинската професија и продолжување на својот живот во својата општина. Со активностите предвидени во проектот директно ќе се влијае на невработеноста кај младите, како еден од најголемите социјални проблеми во руралните области во рамките на регионот. Втора цел на овој проект е да се влијае да се намали економската стапка на миграција на младите луѓе во овој микро-регион и нивна преселба во поголемите градови во Македонија или заминување во странство. „Навистина сум среќен што ваков пилот проект се имплементира во светиниколскиот регион и истиот ќе овозможи заживување на традиционалните бизниси со нови претприемачки вештини. Верувам дека ова ќе ги поттикне младите луѓе да својата егзистенција ја бараат во овие традиционални бизниси и да допринесат овој регион уште повеќе да се развие, а со тоа да се овозможи поголем просперитет на граѓаните“, изјави градоначаникот на Свети Николе Зоран Тасев. Во рамките на проектот предвидено е имплементирање на повеќе активности, вклучувајќи и организирање на обука на теми: маркетинг и промоција на мали, рурални бизниси; е-маркетинг и промоција преку социјалните мрежи, продажни техники на традиционални производи; како и обука за брендирање на традиционалните производи.