КАКО ФОЛКСВАГЕН ДОЈДЕ ВО ПОЗИЦИЈА ДА СЕ БОРИ ЗА ОПСТАНОК: „Тортата е помала, на масата има повеќе гости“

Добивај вести на Viber

Извршниот директор на групацијата Фолксваген, Оливер Блум, ја опиша ситуацијата во клучниот бренд на компанијата како „алармантна“, неколку дена откако менаџментот ги шокираше вработените со своите планови за штедење, вклучително и можното затворање на фабрики во Германија.

Во својата статија за неделното издание на весникот „Билд“, Блум изјави дека се потребни радикални промени за да се обезбеди опстанок на познатиот производител на автомобили.

Во Европа се купуваат помалку возила, рече Блум, додека на пазарот влегуваат нови конкуренти од Азија. „Тортата е помала, а на масата има повеќе гости“, додал Блум.

Европската автомобилска индустрија, додаде тој, се соочува со невидени предизвици.

„И економското опкружување повторно се влоши, особено за брендот Фолксваген. И покрај падот, Фолксваген нема да ја напушти Германија“, вети Блум.

„Ние сме цврсто посветени на Германија како локација, бидејќи Фолксваген изгради цели генерации. Имаме вработени чии дедовци работеле и во Фолксваген. Сакам и нивните внуци да можат да работат овде“, додаде тој.

Фолксваген никогаш не затворил фабрика во Германија и нема затворено фабрика никаде во светот од 1988 година. Сепак, разочарувачките продажби го поттикнаа раководството да размисли за реформи, што ги налути вработените.

Околу 25.000 работници се собраа минатата недела во седиштето на Фолксваген во Волфсбург за да слушнат како раководството ги оправдува плановите што ги објави.