Како „Македонијатурист“ ќе извади ќар од корона вирусот?

Добивај вести на Viber

Во услови на пандемија на корона и вонредна состојба, хотелиерско – угостителската индустрија е прва на удар. Оваа суспензија на хотелиерите и оди на рака на „Македонијатурист“ колку и тоа чудно да звучи. Додека други зборуваат и бројат загуби, Доне Таневски и неговиот тим ситуацијата ќе ја искористат да го реновираат комплетно највредниот дијамант во својата круна „Холидеј Ин Супериор“ во што ќе вложат до 5 милиони евра!

„Македонијатурист“, најголемата домашна хотелиерско – угостителска компанија, годинава планира да вложи 5 милиони евра во комплетно реновирање на својот најпознат и најдобар хотел „Холидеј Инн Супериор“. Ова е дел од планот за 2020 година кој пак е дел од документите кои беа одобрени од собранието на акционери на „Македонијатурист“ што се одржа вчера.

„Македонијатурист“ е скопска хотелиерско-угостителска компанија која управува со пет хотели кои работат во скопскиот регион и тие се: „Холидеј Инн“ и „Бест Вестерн Хотел Турист“ (двата во центарот на Скопје), Хотел „Карпош“, Хотел „Белви“ со својата прочуена летна тераса популарна за свадбени свечености и Хотел „Водно“. „Холидеј Ин“ е најлуксузниот и најугледниот хотел на компанијата и единствен што има категоризација од 5 ѕвездички.

За дел од фелата овој потег на компанијата со која долги години наназад раководи Доне Таневски е очекуван и генерално потегот е предизвикан од конкуренцијата која ја наметна соседниот „Мериот“ кој работи веќе две години и е главен конкурент на „Холидеј Инн“ кој претходно низа години беше најлуксузниот хотел во центарот на главниот град. „Мериот“ (т.е. македонската хотелска компанија Хотел Гранд М н.з.) во 2018 година оствари приход од 6,9 милиони евра што е за 1,6 милиони евра повеќе од „Македонијатурист“.

За некои од хотелскиот бизнис периодот за комплетно реновирање доаѓа како нарачан особено заради тоа што сега со пандемијата на COVID 19 активностите на хотелиерите и угостителите се суспендирани. Заради тоа и е вистински момент за комплетно реновирање во услови кога и конкуренцијата не работи и неработењето не носи загуба.

Речиси без исклучок сите финансиски аналитичари се согласни дека за „Македонијатурист“ финансиската конструкција за реновирањето не е прашање. Заради тоа што компанијата располага со дваесетина милиони евра кои ги чува во депозити или во хартии од вредност. И целиот зафат може да го реши со самофинансирање.

Последното мега реновирање овој хотел го доживеа пред повеќе од 15 години кога и „Македонијатурист“ го доби брендот на „Холидеј Ин“.