Камбек на Хаџимишев: Топлификација нема да грее, ама влегува во бизнисот со струја и гас!

Топлификација го напушта бизнисот со парно греење и влегува во нов бизнис. Компанијата најавува влез во бизнисот со природен гас и струја.

  Од Топлификација посочуваат дека на дел од овие проекти се работело и досега, а сега ќе се реализираат како надворешна услуга на фирми кои се носители на дадени лиценци. Топлификација Инжинериг ќе биде фирмата преку која ќе се реализираат ноите проекти.

„За првиот поголем дистрибутивен систем за природен гас реализиран во Струмица, Топлификација Инженеринг го работеше главниот проект, а сега е надзор на реализацијата на приклучоците до поедините корисници. Со почетокот на работа на системот во грејната сезона 2012/2013 Топлификација Инженеринг ќе почне да дава услуги на овој систем во доменот на управувањето и контролата на потрошувачката на гас, развојот на користење на гас во колективни станбени згради и во делот на фактурирањето и наплатата на испорачаниот гас“ објаснуваат од компанијата и додаваат дека во моментот се работи на обезбедување стратешки партнер за реализација на дистрибутивен систем за природен гас во град Скопје.

Топлификација бара 16 милиони евра од регулаторната комисија Топлификација повеќе од 45 години се занимава со производство, дистрибуција и снабдување со топлинска енергија. Од компанијата соопштуваат дека нивната основна дејност никогаш не била економски атрактивна и најчесто годините ги завршувале со мали позитивни или мали негативни резултати.

“Исклучок од таквите состојби се средината на осумдесеттите години од минатиот век кога Топлификација е најголем загубар во тогашна Југославија и 1993 година која Топлификација ја завршува со загуба од десетина милиони долари и со вкупен долг на крајот од 1993 година од дваесетина милиони долари. Ваквата состојба е присутна и во моментот во скоро сите топлификациони системи во регионот “, велат од Топлификација.

Од 1994 до 2011 година, Топлификација има позитивни финансиски резултати, иако во периодот од 2006 до 2009 има загуби од работењето на регулираните дејности. Сепак резултатите се позитивни, бидејќи во тој период Топлификација ги продава своите акции во Комерцијална Банка, заради вложување во ТЕ-ТО. Од продажба на акциите е остварена добивка од околу 7 милиони евра и вкупен приход од околу 8,5 милиони евра. Вкупниот приход од продажбата на акциите е инвестиран во ТЕ- ТО, а билансните добивки од овие продажби ги покриваат загубите од регулираните дејности во тој период.

Но, бидејќи  менаџментот на Топлификација смета дека регулаторите направиле штета на компанијата со цените за парното греење што ги одобрувале во периодот од 2006 до 2009 направил две експертизи.

Едната на PriceWaterhouse Coopers и другата на Moore Stephens. PriceWaterhouse Coopers вкупните штети ги проценува на околу 18 милиони евра, додека Moore Stephens на околу 16 милиони евра.

Топлификација поднесува пријава за штетите направени,  како што тврди, од регулаторите во периодот од 2006-2007 година, а Јавниот Обвинител на град Скопје во јули 2010 година поднесува кривична пријава и покрена истрага против петте члена на Регулаторната комисија за енергетика во тој период. Во моментот се уште тече спорот помеѓу РКЕ и Топлификација за штетите направени со одлуките на регулаторите, а Топлификација побарува 16 милиони евра.