Каталонскиот референдум ќе мора да чека одлука од Уставниот суд – може да трае со години!

Добивај вести на Viber

Референдумот за независност на Каталонија, по моделот што веќе го примени Шкотска, е суспендиран. Уставниот суд, на барање на централната Влада во Мадрид донесе ваква одлука на итен состанок. Шпанските власти бараат од судот да го прогласи референдумот за незаконит, бидејќи го крши Уставот на Шпанија. Со одлуката на судот да го разгледува случајот, автоматски се суспендира правото за одржување на референдумот. Процесот би можел да трае со години, затоа што практично нема краен рок до кога Уставниот суд треба да се изјасни. Сепак, во центарот на Барселона веќе е поставен голем часовник кој одбројува до 9 ноември, датумот кога требаше да се одржи референдумот за отцепување. Каталонскиот претседател Артур Мас вели дека гласање ќе има. „Процесот не завршува со одлуката на Уставниот суд... наша задача е да гласаме на 9 ноември“, вели и Ориол Хуннкерас, првиот човек на Републиканската левица, партијата која најгласно се залага за отцепување на најбогатиот шпански регион. На гласање се повикани 5,5 милиони избирачи постари од 16 години, а трошоците за организација на референдумот се проценети на 8,9 милиони евра. Политичките аналитичари очекуваат дека Мас по одлуката на Уставниот суд ќе свика вонредни избори, за да ја зајакне неговата иницијатива, но тој сепак не дава никакви навестувања дека е подготвен да отстапи од идејата за референдум. Изјаснувањето за самостојност го поддржуваат големо мнозинство од Каталонците, покажуваат анкетите, и тие се охрабрени од тесниот резултат што по ова прашање беше постигнат во Шкотска. Додека во Мадрид заседаваше Уставниот суд, Мас во Барселона  ја претстави „Белата книга“, документ во кој прецизно се наведуваат чекорите што ќе ги преземе Каталонија доколку граѓаните изберат независност. Документот се состои од 18 поглавја за одбраната, социјалната сигурност, трговските односи и финансиската одржливост на каталонската држава, како и за интеграцијата во ЕУ и меѓународната заедница.