ЌЕ ПАТУВАМЕ ЛИ ЛЕТОВО НИЗ ЕВРОПА: Лидерите на ЕУ се согласија за вакцинални сертификати

Добивај вести на Viber

Германската канцеларка Ангела Меркел изјави дека дигиталните сертификати за вакцинација, кои ќе им овозможат на луѓето да патуваат во Европа и покрај пандемијата на вирусот корона, веројатно ќе бидат достапни пред летото.

Синоќа, на редовната видео-конференција посветена на борбата против пандемијата „ковид-19“, лидерите на ЕУ покажаа дека постои зголемена поддршка за т.н. дигитални сертификати за вакцинација засновани врз заеднички европски критериуми за влез во земјите-членки и отворање на општеството по пандемијата.

„Сите се согласија дека ни треба дигитален сертификат за вакцинација“, рече Меркел на прес-конференција по самитот на ЕУ, што се одржа преку Интернет, пренесува Ројтерс.

Лајен: Најмалку три месеци за системот за сертификација

Претседателот на Европската комисија Урсула фон дер Лајен вели дека земјите-членки ќе треба да донесат одлуки „што ќе може да се направи со сертификатите“ и дека на ниво на ЕУ ќе се користат за да функционира единствениот пазар.

Фон дер Лајен изјави дека ќе бидат потребни најмалку три месеци да се воспостави интероперабилен систем на сертификати за вакцинација во ЕУ.

Системот ќе поддржува информации за вакцинација на една личност, негативен тест за PCR или имунитет. 

„Потребна ни е брза имплементација доколку сакаме овие сертификати да бидат функционални пред летото“, заклучи Вон дер Лајен.

ЕУ потенцира дека сè уште има многу отворени и „политички и научни“ прашања кога станува збор за сертификатите за вакцинација, односно за што ќе се користат или дали вакцинацијата значи и прекин на пренесувањето на инфекцијата.