Ќе се реконструира железничката делница Битола – Кременица

Добивај вести на Viber

Во должина од околу 17 километри, ќе се реконструира железничката делница од Битола до Кременица, на границата со Грција, информира министерот за транспорт и врски, Миле Јанакиески. Тендерската документација е веќе изработена и доставена до службите на Делегацијата на Европската унија на одобрување. По нејзиното одобрување ќе се отпочне со тендерските постапки кои се предвидуваат во втората половина на годинава. Cе очекува градежните работи на оваа делница да започнат кон средината на идната година и да бидат завршени до средината на 2016 година. Министерот за транспорт и врски Миле Јанакиески, во изјава за МИА, вели дека при подготовката на документацијата за оваа делница е земена предвид и стопанската активност и економскиот развој во пелагонискиот регион и развојот на индустриската зона Жабени кај Битола. - Со реализацијата на овој проект ќе се овозможи подобрување на железничката инфраструктура во земјата како стратешка транспортна точка во регионот и ќе се зајакне протокот на меѓународна трговија и директниот пристап до Солунското пристаниште. Особено е значајно тоа што ќе се поттикне протокот на товарниот сообраќај и меѓународниот патнички сообраќај и користењето на железничкиот транспорт во трговијата, истакнува Јанакиески.