Ќе се уриваат ли дивоградбите во Охрид?
Објавено во: Македонија 08 Јули, 2019
Градоначалникот на Охрид, Константин Георгиески најавува рушење на дивоградбите.
Тој вели дека нема да биде едноставно и дека ништо нема да се случи преку ноќ.
Уривањето на дивоградбите во заштитените подрачја на Охридскиот регион, ќе почне кога тие точно ќе бидат утврдени, односно ќе се направи споредба на податоците во Регистарот на дивоградби што неодамна го изработи локалната самоуправа и на НП Галичица. Тие јавно ќе бидат објавени, но само доколку законот го дозволува тоа.
Една од приоритетните задачи на локалната самоуправа, по враќањето на градоначалникот од Баку, ќе биде евалуација на повеќето од 400 дивоградби во заштитеното подрачје со цел да се утврди нивното влијание врз животната средина.
Општината неодамна распиша тендер за уривање на дивоградби, но признава дека средствата и капацитетите со кои располага се недоволни за успешно справување со проблемот.
Справувањето со дивоградбите е само еден од 19 услови Охрид да го задржи статусот на светско културно и природно наследство под заштита на УНЕСКО.